بيني وبينك مسافات
جايلك وفارد باعاتي
شوف كم مِسا فات
بعادك طوِّل ساعاتي
***
يقول أبو العزم يا جماعة
ويثبت حجته بشاهدين
بدوق المر بالساعة
وطبال بيضلل مشاهدين
***
لو جاز كلامي ووضح
وسمعوه أهل الأصول
كدب الندالة اتفضح
سرقونا ربح وأصول
***
ومهما كتروا اللصوص
وأندال بياكلوا في خيرك
راجعي يا مصر النصوص
ما هتلاقي عزة لغيرك
***
زرعت معروف وجمايل
ودعيت تنصلح الاوضاع
وفرعك يا صاحبي جا مايل
وحقي اللي عندك ضاع
***
ياللي طريقك دا ليل
حاسب من التوهان
كان قلبي ليك الدليل
لكن عليك اهو هان
***
يقابلني والعين في العين
يسكت لسانه وعينيه تتكلم
يحكي ويشكي بنظرة عين
ترد عيني بدون ما اتكلم
***
يا فرعون جا موسى
لكل محتار ذي ريبة
وفي الإعلام جا موسى
بهيم عاوز له زريبة
***
يا طبيبي دواك قاسي
زود في جوفي المرارة
قال اصبر وخليك راسي
دلوقتي هشيل المرارة
***
خلي عندك إنسانية
وبالود خليك مصالح
حب غيرك وانسى نية
فيها غدر وسكة مصالح
***
